Мемлекет басшысы Қасым-Жомарт Тоқаевтың халыққа арнаған «Әділетті Қазақстан: заң мен тәртіп, экономикалық өсім, қоғамдық оптимизм» атты Жолдауы еліміздің әлеуметтік-экономикалық дамуының стратегиялық бағытын айқындап берді. Бұл құжатта әділетті қоғам құрудың басты тірегі ретінде заң үстемдігі, экономикалық тұрақтылық, халықтың әл-ауқатын арттыру және ұлттық бірлікті нығайту мәселелері қамтылды. Солардың ішінде көлік инфрақұрылымын дамытуға ерекше мән берілді. Өйткені заманауи жолдар мен қолжетімді көлік жүйесі – елдің бәсекеге қабілеттілігін арттыратын және азаматтардың күнделікті өмір сапасына тікелей ықпал ететін басты факторлардың бірі.
Жолдауда Президент халықаралық транзит дәліздерін дамыту, автожолдардың сапасын жақсарту, авиациялық инфрақұрылымды жаңғырту, темір жол қуатын арттыру, сондай-ақ қалалық және ауылдық жерлердің көлікке қолжетімділігін қамтамасыз ету мәселелерін тереңнен қаузады. Бұл бастамалар елдің логистикалық әлеуетін күшейтіп қана қоймай, өңірлік теңгерімді дамытуға да ықпал етпек. Яғни көлік саласын дамыту тек экономикалық тиімділікке ғана емес, әлеуметтік әділеттілікке де қызмет етеді.
Облыстық жолаушылар көлігі және автомобиль жолдары басқармасының мәліметіне сәйкес, 2025 жылдың алғашқы жартысында өңірде 97,5 шақырым республикалық, 48,5 шақырым облыстық және 47,7 шақырым аудандық маңызы бар жол жөнделген. Сонымен бірге 62,4 шақырым көше жаңартылыпты.
Жалпы алғанда, облыс аумағындағы жолдардың ұзындығы 8 229 шақырымнан асады. Олардың жағдайы тұрақты бақылауда: техникалық тексерулер, қоғамдық мониторинг, қабылдау комиссияларының жұмысы жүйелі жүргізілуде. Мұндай қадамдар Президент Жолдауында айтылған «сапалы инфрақұрылым – халықтың сенімін арттыратын негізгі фактор» қағидасына толық сәйкес келеді. «Жолдардың сапасы – халықтың өмір сүру деңгейіне тікелей әсер ететін фактор. Біз үшін басты мақсат – тек жол салу емес, оны сапалы әрі ұзақмерзімді ету. Осы мақсатта қоғамдық және техникалық бақылау жүйесі тұрақты жүргізілуде», – деді облыстық жолаушылар көлігі және автомобиль жолдары басқармасы басшысының орынбасары Мирхат Әбілмәжінов.
Жолдауда көтерілген маңызды бағыттың бірі – халық үшін көлік қызметтерінің қолжетімділігін қамтамасыз ету. Өңірде бүгінде 126 автобус бағыты жұмыс істеп тұр. Оның ішінде облыстық деңгейдегі 49 бағытқа 890 млн. теңге, ауданішілік бағыттарға 102,1 млн. теңге, ал қалалық бағыттарға 3,1 млрд. теңге қаржы бөлінді. Бұл қаражаттың арқасында халықтың ауылдық елді мекендерден қалаға, аудан орталықтарына қатынауы жеңілдеп отыр. Сонымен қатар «Петропавл – Есілкөл» және «Петропавл – Макушино» бағытындағы қала маңы электр пойыздары тұрақты субсидияланып, тұрғындардың күнделікті қозғалысына тиімді жағдай жасалуда.
Президент ұсынған бағыттар авиациялық салада да көрініс табуда. 2025 жылы республикалық бюджеттен әуе рейстерін субсидиялауға 1 млрд. теңгеден астам қаржы қарастырылды. Соның арқасында облыс орталығынан Астана, Шымкент және Алматы бағыттарына қолжетімді әуе рейстері ұйымдастырылды. Жарты жылдың ішінде 413 әуе рейсі орындалып, 58 мыңнан астам жолаушы тасымалданды.
Бұл көрсеткіштер аймақ тұрғындарының елдің ірі экономикалық және мәдени орталықтарына сапарлау мүмкіндігін кеңейтті. Мұндай қолжетімділік, өз кезегінде, азаматтардың еңбек нарығына қатысуын, білім мен медициналық қызметке қол жеткізуін жеңілдетіп, олардың өмір сапасын арттыруға ықпал етуде.
Осы үрдістің заңды жалғасы ретінде 2025 жылғы 2 шілдеде алты жылдық үзілістен кейін Петропавл халықаралық әуежайында алғашқы халықаралық жолаушылар рейсі орындалды. SCAT әуе компаниясы Шарм-эль-Шейх (Мысыр) бағытына чартерлік рейсті Boeing 737 ұшағымен жүзеге асырып, бүгінде алты күн сайын ұшақ ұшуда. Бұл бастама тек авиация саласының жандануына ғана емес, сонымен бірге өңір туризмі мен халықаралық байланыстарды дамытуға серпін берді.
Көлік инфрақұрылымын дамыту тек жолаушылар үшін ғана емес, жүк тасымалына да өз әсерін тигізуде. 2025 жылдың қаңтар-маусым айларында облыс аумағында 7,8 млн. тоннадан астам жүк тасымалданған. Өткен жылдың сәйкес кезеңімен салыстырғанда көрсеткіш 2-8 пайызға өсіп отыр. Бұл аймақ экономикасының тұрақты дамып келе жатқанын және көлік жүйесінің өндіріс пен сауда айналымына серпін беріп отырғанын дәлелдейді.
Президент Қасым-Жомарт Тоқаевтың Жолдауында айқындалған көлік жүйесін дамытуға бағытталған стратегиялық міндеттер өңірлік деңгейде нақты нәтижелер беруде. Жолдарды жөндеу, жолаушылар тасымалын субсидиялау, авиациялық рейстерді қолжетімді ету, халықаралық байланыстарды нығайту – барлығы халықтың әлеуметтік жағдайын жақсартып, елдің бәсекеге қабілеттілігін арттыруға бағытталған.
Ләзиза МЫРЗАНТАЙҚЫЗЫ,
«Soltüstık Qazaqstan».